looks007
生活平靜日子自然過得好快,原來踏入性行業已經有七個月。
 
咁耐以嚟唔少人話我「扮咩,咪又係雞」,對此我一向直認不諱,我的確係左手收錢右手提供性服務。但個Page畢竟叫得援膠手記,總唔可以掛羊頭賣狗肉;今日我決定真‧援助吓大家交際,講吓點樣洗四位數嚟搵援交妹先唔會浪費。
 
先小人後君子,我嘅大前提係,性從來係兩個人嘅事,一場好波係要情投意合先打得成嘅。你畀咗錢,箇然買到囡囡除衫同你做全套,甚至買佢嘅溫柔嗲聲,即係所謂「女朋友Feel」;但你要喺囡囡身上換到好服務,甚至令佢慾火焚身心甘情願比多你,你唯一要做嘅就係取悅囡囡,甚至留個好印象吸引囡囡。
 
唔好硬住 – 你個拳頭。咁樣講聽落可能會好刁蠻,「喂,大佬,我畀得錢,重要我Serve你?呀姐你無嘢啊」。呀姐我份人就會無乜嘢嘅性服務同其他行業最唔同嘅點係,身體好誠實;專業嘅援交妹同專業嘅七仔收銀一樣,對住任何客都可以保持熱情微笑,但慾火焚身流水潺潺秘道抽搐,唔係一句「態度專業」就扮到。
 

一,講嘢清晰有內容唔好單字Hi
首先講樣好多人都做唔好嘅基本嘢,約會援交妹,最重要唔係你有錢有樣(陽具)有六呎長,而嘅係你拎到佢個Service Plan。無論你用咩通訊工具,同援交妹講嘢一定要清晰簡潔,一句講表明來意。禮貌啲可以話「Hi,我喺XX見到你個Post,想問你個Plan係點,服務包咩啊。」,簡潔啲咪一句「Hi. Any service package?」。
好多人都會單字Send句「Hi」過嚟,我見多Message,就未必覆,唔知佢係問價定問其他嘢,見佢無特別嘢問,就隨手「Hi」返佢,佢問我「做緊咩」,我忙緊又唔識佢,就緊係唔覆佢;到第二朝佢又彈個面紅公仔畀我,到夜晚我再笑喊返佢;試過好多次,如是者斷斷續續一個月,佢都唔會成功問到我個Plan係咩。
 

 
實情係援交市場上供少求多,如果Keep住有做宣傳嘅女仔,一日四十個Messages係閒事,唔覆你句Hi唔係因為有心待慢,而係佢知未來十日日程都就快滿,覆咗都唔會得閒約;與其覆你句意義不明又未必係問價嘅「Hi」,倒不如同其他師兄短訊來往夾時間好過。
你Send得Message都想人快啲覆。當市面上七成人都只係會劈頭一句「Trade?/Plan?/Hi!」嘅時候,你花多三十秒打多兩行字,加句「早晨,我想約你呀」,其實已經有誠意好多,囡囡對你第一印象好之餘又會覆你先,何樂而不為?
"
 
二,唔好死纏爛打講價
講開房禮儀前,先講問價嘅事。儘管你覺得對方未必值,但每個人心目中都會為自己標個價。囡囡覺得自己值千八就係千八,如果你負擔唔起或者覺得唔值,頂多還價一次禮禮貌貌試佢底價:「唔好意思,千六蚊出唔出得呀?」若然對方真係唔得,你就另謀高就喇。再纏繞落去講數,只會嘥大家時間,令人覺你煩;最差嘅情況係,你講一輪價不果,纏咗人五分鐘最後又係用原價約返出嚟,你一個崩都無畀少到,但囡囡見你唔俐落,對你第一印象大減,呢啲印象分會喺身體反映返出嚟,師兄你就蝕曬底喇。
/
 
三,傾好價錢服務,唔好臨時講數
有啲囡囡嘅Package可能好簡潔,可能得價錢同Q數,請你不厭其煩問清楚少少,到底可以玩幾多個鐘、錫唔錫得、口交洗唔洗套、一齊沖涼又得唔得,問清楚,唔洗入房先講數咁無癮。
 
我知好多人都鍾意中出,但如果傾價錢傾服務傾好咗要戴套,見面時就唔好存饒幸之心,諗住臨場可以「側側膊」叫囡囡除套。我試過幾次喺Message講好咗全程要用套,但情到濃時時師兄每三分鐘就哄我一次:「唔係呢,不如除套喇。」可能佢只係搏好彩咁問一問我,但咁講一講,我真係好不安,所以全程都要望實、摸住個套套係咪重在位,手眼都無得放鬆,加上覺得對方無乜口齒個心唔係幾順氣,帶住咁重戒心同負面情緒,又點全心將身體交畀你呢?
 
再提多次,除非對手係你固定嘅性伴侶,否則都應該落力為細佬,笠返個膠套。畢竟大家唔知對方背景,對方話自己乾乾淨淨無性病,你真係咁信佢?至於囡囡呢,為咗多嗰幾千蚊而換一個有排先斷到尾甚至跟你一世嘅病,條數點計都唔抵。出嚟玩最緊要安全,出嚟玩最緊要安全,出嚟玩最緊要安全啊!)
 
四,打開話題同查家宅係兩回事
問價同真正約會日子,中間通常隔兩日至一個月不等。呢段期間雙方總會嗲兩句認識多少少,我發現好多師兄見面談吐正常,但最初WeChat嗰陣真係完全唔識同人傾計。
 
好多人問完價劈頭第一句就問:「做緊咩?做邊行?住邊?波幾大?」呀大佬,填問卷咩。我有我嘅私人生活,我做邊行關唔關你事呢?你可能會覺得:「咁現實㗎交個朋友啫,吹兩句水都唔得?」唔係話唔得,但要交朋友,就記得用返同新朋友講嘢嘅語氣:「咦係喎,你做邊行㗎」,又話者先講自己嘢:「我做IT㗎,你正職返咩㗎?」。一抽問號片埋嚟好似查人家宅緊,朋友唔係咁做㗎喎。
 
如果傾兩句又搵到話題對方主動接落去、傾出友誼緊係大家都好彩喇,否則人地個幾鐘先覆你一次機你又堅持一問一答咁落去,都只會磨光對方耐性。想搵話題嘅方法都唔係無嘅,有啲用Instagram嘅女仔會Upload自己同師兄睇過戲嘅戲飛、或者影吓食物呢類生活小片段,你可以用嚟打開話題。或者大路啲問佢「你覺得你起機叻啲定葉劉叻啲睇咗Beauty and the Beast未呀」,呢啲都係你搵嘢講嘅小幫手。
 
不過無論你幾努力搵話題,係Trade過見過真人前,你只係個女仔五百呎長WeChat friend list上其中一個潛在客仔,連朋友都談唔上,對方無咁多時間應付你情有可原 – 畢竟全職賣肉嘅太多客應接不暇,兼職賣肉嘅日頭亦工作繁忙,大家都要搵食㗎嘛。
/
五:傾計目的只為調情  唔啱傾唔好勉強
怕唔怕唔認識到時會Dead Air好尷尬?無事嘅。諗清楚你搵囡囡嘅目的係咩先,如果你只係為咗買春宵一刻嘅歡愉,你絕對唔應該冒住對方覺得你煩嘅危險為吹水而R水吹。
 
相反,你要做嘅只係為咗未來一次約會熱身,製造期待,你可以試吓約會前一晚、或者重有三四個鐘Trade前,Send個Message話畀佢聽你好心急(或者直接啲:諗起你就硬硬地),調情挑逗兩句,讚佢幾句令你,畀對方知道你對佢身體有渴求,點到即止,已經好夠。
 
的確唔少女仔都對自己身體欠自信(唔好幻想每個出嚟做嘅女仔都天生淫底,囡囡搵餐飯食啫,唔係個個見仔都會飛擒大咬),你嘅幾句(睇落)衷心嘅讚美,可能係令佢放開懷抱同你投懷送抱嘅最佳催化劑。至於深入傾計呢,唔洗急住Trade前傾,如果真係啱傾,見過面落咗床自然會有計傾 – 呢篇嘢嘅內容都係三四個師兄陪我手傾出嚟㗎咋;唔啱傾就無謂勉強喇,你真係咁需要搵人吹水甚至談心嘅話,認真喺日常生活交吓朋友喇。
 
我當然明白知唔係個個人搵囡淨係為咗體液交流,如果你搵囡嘅目的係想有人陪你傾計,與其等人成三個鐘先覆你一次、重要怪人勢利陪你傾多兩句計都唔得,倒不如你行主動一步,問吓佢有無傾計Plan,按月畀返錢人。
 
「同你傾計」同「陪你傾計」嘅分別好大,前者係大家有共同話題,個波拋嚟拋去拋唔完,雙方喺工餘時間吹吓閒計,大家都開心;但「陪你傾計」只係你一廂情願想同囡囡傾,但你講嘅嘢挑唔起對方興趣,你要佢同你講嘢,其實係使用緊佢時間服務,唔可以要人奉旨Free畀你呀(Cam Sex都要買點數喇,隔Mon服務都係服務呀)。
 
六,性愛新手唔好介意事前虛心問多幾句
做愛唔係表演鬥叻,唔係要你喺囡囡面前顯示自己識幾多嘢,而係要搵方法令對方爽,從而令到自己更爽。如果你唔識令對方爽,麻煩開口問,唔好死撐。儘管人人興奮帶各異,但身體結構雷同,點樣愛撫同點樣幫人美容揼骨一樣,令人舒服嘅方法總有個譜,你無得唔識扮識。有啲男仔會為咗面子,唔好意思開口同囡囡講自己經驗淺;但經驗嘅嘢呃唔到人,你一味用自己喺網上睇返嚟好似Work嘅方法狂咀猛摷,錫我錫到成塊個咀壓落塊面去好似狗仔食嘢咁,將我個唇強行壓返落我排牙度捽嚟捽去,真係好痛。但我總不能喺你意興大發時開補習老師Mode,停止你動作再示範一次,唯有忍住痛忍住唔舒服畀你錫,顧住痛,投入唔到,後果又會喺身體度反映返出嚟。
 
但無喇喇要點開口同對方講自己其實好多嘢都唔識呢?我覺得最好一開始喺Message講定「其實我無乜經驗㗎,可能好多嘢都要你教/你要話畀我聽點整你先整得舒服呀」,再加上埋牙時耐唔耐問句:「咁樣錫舒唔舒服啊?/不如你錫我先(再偷師)」就可以。禮禮貌貌講定自己情況,都總好過入到去亂衝,或者緊張到瞓喺度死魚咁,令人覺得你大懶爺要人服侍好無癮。唔洗怕醜驚個囡囡會喺心中批判你,誠實總係對你有好處;我自己就唔太揀客嘅(搵日交代吓咩人我唔接,搵日),但的確聽講過有囡囡會唔鍾意接啲太青澀嘅師兄,驚嗰兩個鐘玩得唔開心。但我啱啱都講過,有無經驗一埋身就無所遁形,你喺Message呃得佢一時,唔會呃到佢兩個鐘。
 
"
 
 
要留意嘅係,唔係話人生搞嘢次數多就會變性愛老手。同打波一樣,人人性愛天分唔同,醒目嘅、多性伴侶嘅人可以靠觀察,喺唔同對手身上左抄右抄,抄夠十零廿個人,再將自己覺得舒服嘅技用巧返落下個對手度,你自然會識錫識愛撫。但如果你性伴侶少、以往嘅愛人從來無認真同你做過檢討,又或者你食足十條女都唔覺自己有咩進步的話,你就真係要喺援交妹身上學吓嘢喇。
 
上篇講住咁多先,下篇會講吓點樣先可以換到拍拖Feel嘅約會、點樣令唔滿足於溫馨性愛嘅你做Dom(主導者)嘅慾望、點樣調整自己同囡囡對約會嘅期望落差。其實下篇我一粒字都未落筆寫,大家有嘢想瘋狂小組討論就INBOX 「地方的蕩婦(的不專業援膠手記)」同我講聲喇。老實講,出嚟做嘅囡囡唔志在多一次少一次高潮,囡囡身體好誠實,今次唔夠濕佢咪等下次囉;但畀錢嘅係閣下,打唔打得開呢個誠實嘅身體,就睇師兄你造化喇。
 
註:我習慣將「援交妹/私鐘妹」當同義字咁用,至於 #PTGF 則指賣吓拍拖感覺、外加少少攬少少摷嘅女仔。
 
編案:在找援交之前,請自行衡量風險。

回應此文章: