looks007

大家好!恭喜Open Room成功開台啊!祝收視蒸蒸上。

 

之前係Facebook誤打誤撞識左呢到總編啊刁!多謝佢俾我呢個機會寫下文,講下一啲關於性呢個話題既事。好欣賞佢地既想法,畢竟大家都可能只係在中學課堂上學習一小點的知識,而Open Room 就想分享唔同既性資訊,探討各個關於性議題 。

 

自我介紹先,我叫做基斯坦奴,90後,大約於兩年前開始經營性玩具既生意仔,初頭都係間鋪頭仔賣下玩具,做下一啲網上生意,慢慢先再做埋批發生意。

 

門面野就唔講咁多啦,大家又知唔知咩係性玩具呢?

 

情趣用品、成人玩具(sex toy,日語:性具),古稱淫器、淫具,泛指幫助性愉悅或性行為所使用的器具。有些仿效類似性器官之觸感。此外,具有性意味的一些擺設或小玩具等也是廣義的成人玩具。虐戀用具通常也被認為是性玩具。

 

初頭比朋友知道左賣性具時,佢地既第一個感覺都係,嘩!唔撚係啊?搞啲咁既野,你出黎搞笑咋?但我都只能夠好認真咁講「係啊,我真係賣Sex Toy!」 仲比人改左個花名叫做玩具大王,照樣派下卡片,就好似N年前既信和四樓無格仔Sosad

 

當時點解會無啦啦搞性玩具呢個生意呢?係因為覺得在香港其實有一定既市場,只係我地接觸唔到,大多數既客戶都Online買性玩具。自己有好多客係未見過嫁。佢地訂完貨,我就郵寄俾佢地,都係呢行既一般做法,基本上都包得好密,連送貨員都唔會知入面係咩。網上既生意,做法都係眼見手板功夫,無咩趣事發生,反而在實體店睇鋪就好玩好多啦。

 

在兩年前岩岩開鋪時,當時仲係一個中學生,就已經要開始賣性玩具。初初睇鋪時,自己要賣性玩具,都未習慣,感覺怪怪咁。當時連18歲都未足夠,性經驗又唔係多,有時都比客人問問題問到口啞啞。基本上入得黎鋪頭既客人,都一定會大過我。連鋪頭都寫住18歲以下不準進入,都真係幾佶你唔到!ROFL!

 

 

 

個時仲係中學生,平時當然仲要番學啦。有幾次都係工作需要,需要帶住一袋貨番學,其實都幾過份下ROFL。

 

有一次比同學發現左,男同學好似發現新大陸咁。禁都禁唔住就拎曬出黎Condom同震震棒係到玩,仲係女同學面前Fing黎Fing去,都搞到我幾唔好意思。都唔明有咩特別 ,我都差唔多日日對住呢啲野。最後當然比Miss發現左,仲比佢照肺。當然啦,我咁好既學生,絕對唔會理佢啦。

 

其實在睇鋪頭,對住唔少客人都有唔少既趣事既。當時我地租鋪選好了一個鋪位啦。係我地做緊裝修時,隔離既鋪位都岩岩租左出去。仲早過我地開張,原來係間兒科診所!心諗唔係啊,係間性玩具鋪頭隔離就係一間兒科診所。

 

每日下午4點幾5點就係診所開既時間,家長同小朋友又會等到出門口,所以就成日有班有班小朋友衝黎。家長都會話「啲玩具唔係俾你地玩」,之後小朋友會指住鋪頭既Toys字問明明玩具點解無份玩,有啲小朋友仲入黎拎啲棒棒係到Fing。

 

有部分家長話我地係呢啲地方開啲咁既野,好無嗲,其實都係做生意姐。你唔接觸性都唔會有個小朋友啦。

 

其實初初經營呢間鋪頭都以做生意,搵錢係第一個目標,之後發覺香港市民對性仲係有一種抗拒感,依家希望可以大家改變對性既想法,重新認識性。之後再有機會同大家講下經營性玩具店既趣事啦!

 

 

90後的基斯坦奴

回應此文章: